Kaixo Mundua lehiaketaren bigarren edizioa dela eta, lehiaketa antolatu eta irabazleak izan diren ikasle eta irakasleak gonbidatu ditugu saiora. Hasteko, Josu Waliñok, PuntuEUS Fundazioaren zuzendariak lehiaketaren emaitzen inguruan hitz egin digu.

Jarraian, DBHko kategorian irabazle suertatu den ekoweb.eus webgunearen egileek haien esperientziaren berri eman digute.

Bestalde, Batxiler kategoriako saria nafarrek eskuratu dute. Eunate BHI ikastetxeko irakasle den Aitor Oregik bere ikasle Naroak sortutako webgunea azaldu digu. Hona hemen esteka, begirada bat botatzeko: doinuabanda.eus.

Segidan, Lorea Argaratek, Kaixo Mundua lehiaketaren epaimahaikideak aurtengo edizioaren sentsazioak plazaratu ditu.

Bukatzeko, arduplay.eus webgunearen egileak elkarrizketatu ditugu. Aretxabaleta Lanbide Heziketa zentroko ikasleek lortu dute Lanbide Heziketa kategoriako webgune onenaren saria.