Orain badirudi big data delakoak konpondu behar digula mundua. Gailu, webgune eta aplikazioen erabiltzaileen datuak era masiboan bildu eta multzo masibotan aztertzeak ekarri behar omen digu hurrengo iraultza, bateko eta besteko guruei kasu eginez gero: gure ekonomia eraginkorragoa egingo du, eta ahalmena egingo duguna uneoro jakiteko zer behar den, eta non.

Baina albisteak irakurrita, zaila egiten da big dataren mantraren atzean egon litezkeen bestelako interes ezkutuei  ez erreparatzea. Zeren, tira, gauza bat da ‘Lehen hitza euskaraz’ sakelako aplikazioak, adibidez, aitortzen dituen helburuekin lotutako informazioa jasotzea: erabiltzailearen telefonoaren marka, euskaraz konfiguratu daitekeen ala ez, euskaraz konfiguratu den ala ez… Horrela zenbaketa zehatz bat izan dezakegu, zenbat mugikorrek eskaintzen duten interfazea euskaraz jartzeko aukera, eta zenbat jartzen diren benetan… Ados, ez da aplikazioaren helburu zehatza, baina zerikusi zuzena dauka, gutxienez.

Baina oso bestelako kontua da, adibidez, Espainiako futbol ligaren aplikazioarekin gertatu dena. Ustez partiduen egutegiak eta emaitzak kontsultatu eta partekatzeko aplikazio bat dena, benetan espioitza tresna bat da: inguruko zaratak entzun eta, futbol partidu baten erretransmisioa baldin bada, seinale bat bidaltzen dio Liga enpresari, berak egiazta dezan GPS lokalizazio horretan partiduen emanaldi publikoak egiteko lizentzia ordaindu den ala ez. Troiako zaldia, bete-betean: 10 milioi deskargatik gora duen aplikazio ustez sinplea ingurukoak zelatatzeko sare erraldoi bilakatu da, enpresa pribatu baten mesedetan.

Egia esan, beldur apur bat ere ematen du kontuak. Ligako aplikazioan egin badute, beste edozeinetan ere egon litezke antzeko tranpak. Nola dakigu euskarazko aditzak osatzeko aplikazio hark ez digula  isilpean entzuten, ergatiboa ondo erabiltzen ote dugun jakiteko? Nork ziurtatuko digu erabiltzen dugun GPS aplikazioak ez dituela gure auto barruko elkarrizketak entzuten, zer dakit nik, erosketak egitera goazenean prezio onenak non dauden erabakitzeko?

Beharbada -baina beharbada soilik- kontu hauetarako zorte ona izango da euskarazko produktuen kontsumoa txikia izatea. Kontsumo txiki horrekin, nekez lortu ahal izango da benetan ‘big’ datarik. Eta horrek seguruenik uxatu egingo du datu bilketa masibo eta arraroak egiteko tentazioa… euskarazko aplikazioak sortzeko tentazioa uxatzen duen neurri berean, behintzat!

Aurreko bidalketa

telefono mugikor berria erosteko buruhaustea

Hurrengo bidalketa

Traolaren erabilera egokia sare sozial bakoitzean

Egilea

Joxe Rojas

Joxe Rojas

@joxe
Kazetaria izan nahi nuen eta bulegari lanetan bukatu dut. Egunez, komunikazio eta IKT arduraduna naiz TOKIKOM, Toki Komunikabideen Bateragunean. Gauez, txio-txioka aurkituko nauzue Twitterren, edo bestela teknopata.eus blogean.

Bai: neu ere neure frikiak bizi nau.

2 Comments

  1. joni ubeda
    uztaila 1, 2018 at 9:52 am — Erantzun

    Post honen musika banda izan daiteke.
    ‘Troyako smartphonetan’ lehen aldiz hemen aurkitu nuen:

    https://www.youtube.com/watch?v=VlwBl2k8WGg

    INFRASOINUAK

    Badatoz infrasoinuak, somatzen ez ditugunak
    itsasoan zehar, lanerako baldintza eskas eta makur
    horietan edota eskoletan bide eginaz

    Zein da gai infrasoinuak entzuteko
    behingoz aintzat hartzeko
    zein da gai su artifizialak tarteko
    arreta jartzen hasteko

    Hor daude infrasoinuak, hor daude
    futbolarien orrazkera nazikaran
    nire kontraesanekin eraiki dudan
    leihorik gabeko dorrean
    gizonezko hegemoniko txurion jarreran
    Troyako smartphonetan
    makrozenbakien ifrentzuan

    Zein da gai infrasoinuak entzuteko
    behingoz aintzat hartzeko
    zein da gai su artifizialak tarteko
    arreta jarri eta adi egoteko

    Kea ugari, surik ez
    kea ugari baina ez zarela zu
    itto-hurren zabiltzana… ala zer diozu?
    Mundu guztia korrika dabilela ere ikusten dut
    ezin asma lasterketa den
    iduri du ihesaldi kolektibo bat

    Zein da gai infrasoinuak entzuteko
    behingoz aintzat hartzeko
    sendagai ala birus aukeratzeko
    ilunpean argitzen hasteko

    Argia izateko

  2. uztaila 2, 2018 at 8:16 pm — Erantzun

    Epala Joni!

    Ba bai, oso egokia. Chromecast konfiguratzeko aplikazioak, adibidez, infrasoinuak erabiltzen ditu gailua eta telefonoaren artean komunikatzeko!

    Buf!

Utzi erantzun bat

Zure e-posta helbidea ez da argitaratuko. Beharrezko eremuak * markatuta daude