Azken aldi honetan teknologia kontuak biltzen diren medioetan bloke-kate edo blockchain, NFT, kriptodiru eta metabertso kontuak gehien jorratzen diren gaiak direla jabetuko zineten. Iñaki Alegriak hemen bertan egindako #retroinformatika ariketan, Second Life ekartzen zigun gogora, metabertsoa puri-purian den honetan. Urko Larrañagak ere, Leire Palacios eta Ainhoa Marzolek aireratutako saioan esandakoei tiraka, metabertsoa eta blockchain edo bloke-katearen inguruko hausnarketa egiten zigun. Baina testuinguru honetan, inon gutxi aipatu da Diem-i jazo zaiona, hasieran Libra bezala ezagutu genuen proiektua.
Zuckerberg jauna dugu korapilo honetan ere protagonista. Orain egun gutxi Metak/Facebooken burtsan jasan duen beherako historikoarekin alderatuta huskeria bat da hemen biltzen dudana, baina akaso honek ere bere eragina izango zuen.
2018an, bloke-kate eta kriptodirua puri-purian zen urtean, Libra proiektuaren berri eman zuen Zuckerbergel. Batez ere Bitcoin kriptotxanpon ezagunaren ezegonkortasuna ahuleziatzat hartuz, Zuckebergek merkatuko teknologia konpainien artean kritpodiruaren lidergoa hartu nahi zuen txanpon egonkor bat prestatuko zuela hitzemanez. Teknologia eta finantza munduak lotu nahi zituen, banku zein bestelako merkatuko aktoreekin (Visa, Mastercard edota Paypal besteak beste) akordioak gauzatuz. Hasera batean proiektua begi onez hartu zuten analista zein espezialistek, baina ez zuen luzaro iraun optimismo hark, izan ere 2019 amaierarako egitura hartatik kanpainia ezagun gehienek alde egin zuten. Urtebete beranduago, izena aldatzea erabaki zuten. Libra alde batera utzi eta Diem izatera pasa zen – kasualitatea izango ote da orain gutxi Facebook izatetik Meta izatera pasa izana? -, medioetan ia aldaketari oihartzunik eman gabe.
Bada, urtebete pasatxo beranduago, Diem-ek bere jarduera bukatutzat eman du berriki arduradunek adierazi dutenez. Proiektua bertan behera uzteko arrazoi nagusi moduan finantzaketa instituzioekin aurrera jarraitzeko izan dituen zailtasunak eman dituzte. Askok, ordea, benetako arrazoiak bestelakoak izan direla uste dugu, proiektuaren nondik norakoak ikusita.
Kriptodiru propiorik gabe da, beraz, Meta konpainia prestatzen ari den metabertso horretarako. Esango nuke gertakari honek joko taula aldatu duela eta teknologia aktoreek (Metak berak, Amazonek, Microsoftek, Applek,…) hurrengo hilabete eta urteetan emango dituzten pausuetan eragina izango duela, era batera edo bestera.
Nire aburuz gai honen ondoriorik garrantzitsuena Zuckerbergek erregulatzaileekin bere nahiak aurrera eramateko gero eta zailtasun handiagoak dituela da. Eta horrek, egia esan, asko pozten nau, bere konpainiaren jarduerak gertutik kontrolatuta izateak gizarte hobeago bat izango dugula uste baitut.
